Eric James Shigongo (kulia) akiwa na mama yake mzazi.

ERIC Shigongo ameamua kuelezea historia ya maisha yake yote, alikotoka mpaka alipo sasa bila kuficha umasikini ulioikumba familia yao, manyanyaso na mateso mengi kutoka kwa watoto wenzake mitaani huku akiitwa majina mengi ya kukarahisha.
Ni majina haya ndiyo yaliyomfanya aamue kubadilika, aliufahamu umasikini na katika maisha yake hakuutaka na kuamua kubadilika. Mara kadhaa akikumbuka maneno ya baba yake kwamba hawakuwa mahali sahihi akiwaeleza kama yeye alishindwa, basi wao walitakiwa kufanya kitu fulani maishani mwao.
Ni maneno hayo ndiyo yalimfanya kuukataa umaskini na kuupinga kwa nguvu zake zote. Hakika hakuupenda. Marehemu baba yake, hakuishia hapo, aliwapa elimu ya ujasiriamali kwani alielewa hicho ndicho kitakachowakomboa katika maisha yao.
Hata darasani, uwezo wake ulikuwa wa chini kabisa lakini alijaliwa kipaji kikubwa ambacho hakuna mwingine aliyekuwa nacho, kusimulia hadithi. Anaendelea kusimulia historia ya maisha yake...

KWA sababu nilifeli Hesabu, Historia,  Jiografia, Siasa, Kiswahili na masomo mengine, basi nilionekana sina kitu chochote ndani yangu, hakuna aliyefahamu kwamba kule kusimulia hadithi, kilikuwa ndicho kitu ambacho Mungu alikiweka ndani yangu ili kinikomboe kutoka kwenye umasikini na hatimaye kusaidia Watanzania wenzangu na hata kukutana na watu ambao hakika nisingekutana nao kama nisingekigundua kipaji changu.
Hivi ningekutana wapi na kuwa rafiki wa mtu kama Dk. Reginald Mengi, Dk. Jakaya Mrisho Kikwete, Dk. Emmanuel Nchimbi, Richard Branson, Donald Trump kama ningeendelea kukubaliana na jina la ujinga nililoitwa kwa sababu sikufanya vizuri darasani? Ndugu zangu nataka kusema wazi leo kuwa maisha ambayo watu wengi wanaishi si maisha yao, walichaguliwa na watu wengine na wao wakakubali.
Kataa jina hilo, simama na uanze kupeleleza ndani yako Mungu ameweka nini. Ndiyo maana wakati ule Magreth Sitta akiwa Waziri wa Elimu niliwahi kumwandikia barua na kulalamika kwamba mfumo wa elimu uliopo hapa nchini unawafanya watoto wanaofeli masomo, waitwe wajinga! Wajione hawafai na wasio na faida bali wale wanaofaulu na kuitwa wenye akili ndiyo wajione bora.
Lakini mwisho kinachotokea ni kwamba, aliyekuwa na akili nyingi darasani, akasoma hadi chuo kikuu na kukuta ajira hakuna na  aliyebaki kijijini baada ya kufeli darasa la saba akaamua kujiingiza kwenye ujasiriamali kama njia pekee aliyobaki nayo, lakini wakati msomi anarejea kutoka chuo kikuu atamkuta mjinga ana maduka mawili, mashamba ya kahawa na  malori ya kubebea mizigo! Hii huwafanya wasomi mwisho wajione wajinga.
Siongei haya kupuuza wasomi au kupuuza elimu kwa sababu mimi sikusoma, ninachosema hapa ni kwamba, hata watoto wangu nawapeleka kwenye shule nzuri ili wapate elimu bora, lakini mwisho wakirejea nyumbani nawafundisha ujasiriamali, hicho ndicho nilichotaka Wizara ya Elimu ifanye, ifundishe ujasiriamali kwenye shule zetu si kufanya kama ambavyo huko nyuma ilifanyika; kuondoa masomo ya biashara,  kilimo kwenye mitaala ya kufundishia. Hivi tulikuwa tunajenga taifa la aina gani?
Sikumbuki kama nilijibu hata swali moja kwenye mtihani wangu wa darasa la saba, karibu kila kitu nilikiona ni ‘Kichina’ kwenye karatasi ya mtihani. Ninachofahamu ni kwamba matokeo yalipotoka nilikuwa nimefeli, jina la mjinga likathibitika kabisa. Na nikawa na uhakika asilimia mia moja kwamba kweli nilikuwa mjinga sababu hata serikali ilikuwa imeona hivyo. Mimi na dada yangu wote tulifeli.
Dada yangu alilia sana, lakini mimi niliona ni sawa na nilimshangaa kwa nini alilia, tushinde vipi wakati  tulikuwa wajinga? Kilichofanyika baada ya hapo ni kukubaliana na  matokeo, kama sikosei walifaulu wanafunzi wawili tu darasa zima, majina yao siwakumbuki maana sikuwa na mawasiliano na mtu yeyote baada ya pale.
Nikajiunga rasmi na baba yangu sokoni Buzuruga, kufanya kazi aliyonifundisha; kuchuuza. Kazi yangu ikawa ni kumsaidia kuwafungia wateja bidhaa, lakini jioni nilifanya kazi ya kurusha (kulangua) sigara ambazo wakati huo zilikuwa ni bidhaa adimu, ndani ya muda mfupi tu nikawa nimeshakuza mtaji wangu mpaka shilingi mia saba, nikamkabidhi baba anitunzie! Nikaendelea tena,  wakati huo nikawa nimekwishaanza biashara ya kuuza mafuta ya taa mitaani na karanga za kukaanga, wakati mwingine mayai ya kuchemsha.
Nikifanya yote hayo niliwaona  watoto wa matajiri na watu wenye uwezo wakienda shule, wakati huo  Mwanza kulikuwa na shule mbili tu maarufu, Mwanza Sekondari ambayo iliitwa kwa kifupi Mwanza Seco, wanafunzi wake wa kike walivalia sketi za kijani zenye mistari miwili ya rangi nyeupe inayoshuka chini! Msichana aliyevaa sketi ya aina hiyo alijiona malkia mtaani na aliheshimika kweli,  acheni siku hizi watu wadharau elimu ya sekondari kwa sababu kuna sekondari za kata, wakati ule mtoto wa sekondari si mchezo, aliheshimiwa na kila alikopita watu walisema, “Kanasoma seko” na walijidai.
Shule nyingine ilikuwa ni Lake Sekondari, ambako watoto wa matajiri tu walisoma kwa sababu ilikuwa ni ya kulipia, wasichana walivalia sketi za rangi ya kahawia, nazo zikiwa na mistari miwili ya kushuka chini kama Mwanza Sekondari, wavulana walivaa suruali za kahawia na wote mashati meupe! Kwa hakika walivutia na nilitamani kuwa miongoni mwao, lakini ujinga wangu ndiyo ulikuwa umeniweka sokoni kushirikiana na baba. Walipopita wakienda shule niliwaonea wivu.
Yombo Paul ambaye hivi sasa kama sikosei anafanya kazi na shirika linaloitwa FINCA ambalo hutoa mikopo kwa wajasiriamali na  Fidelis au Vedastus ambaye hivi sasa anafanya kazi Tanesco Mwanza, walikuwa ni miongoni mwa vijana waliokuwa wakisoma sekondari wakati ule, Fide pia alisoma kwa tabu sana lakini alikuwa na akili nyingi, alijulikana kama mchawi wa hesabu na wakati wa likizo alifanya kazi ya ufundi uashi.
Sitaisahau siku ambayo Yombo na Fide walipita sokoni Buzuruga na kukuta njaa imenishika kuliko kawaida, nataka niende nyumbani kula lakini baba amekataa akinitaka nisubiri mpaka jioni kwa sababu hakuwa na mtu wa kumsaidia, alikuwa akiniambia, “ikazage duhu ngosha” (jikaze tu mwanaume), siku za hivi karibuni Yombo alinitembelea ofisini kwangu na nilishangaa sana aliponikumbusha maneno hayo ya baba yangu, kumbe aliyasikia, tulicheka na kusema, “ya kale yamepita, tazama sisi ni watu wapya.”

Je, nini kitaendelea? Usikose wiki iijayo.