TONY na Deusdedith Kahungo wanaendelea na kazi ya kuhakikisha wanapata namba nne za siri za kompyuta iliyokuwa na artwork ya fedha za Buzilayombo. Wanatumia kila mbinu kuhakikisha wanazipata namba hizo za siri ili kazi ya kuchapisha noti kwa kutumia mtambo walioununua kwenye Kampuni ya American Bill Currencies ianze.
Baada ya kufanikiwa kupata namba kutoka kwa bwana Masato, Msanifu wa Benki Kuu baada ya kumpa dola elfu kumi, Gavana wa Benki Kuu, Festo Chalo aliyekuwa na sifa ya kupenda totoz na kwa Mkurugenzi wa Usalama wa Taifa, Peter Kizwalo, sasa wanahamia kwa Waziri wa Fedha, Andrea Kazinja.
Upelelezi wao wa awali unawafanya wagundue siri kubwa kuhusu maisha ya kigogo huyo wa serikali kuwa kumbe alikuwa akishiriki mchezo mchafu wa ushoga. Kijana Chisunga aliyekuwa akifanya kazi ya kutunza bustani nyumbani kwake, ndiye aliyekuwa akimuingilia kinyume na maumbile na uchafu huo ndiyo uliosababisha ndoa ya mheshimiwa huyo kuvunjika baada ya mkewe kugundua.
Tony na Deus wanasafiri mpaka kwenye kijiji alichokuwa anaishi kijana huyo, Isangu ambapo wanafanikiwa kumpata na kumdanganya kuwa wao ni maofisa wa Benki Kuu ya Buzilayombo. Wanatumia ushawishi wa fedha kutaka Chisunga awasaidie kuipata namba ya siri kutoka kwa Waziri Kazinja.
 Je, nini kitafuatia?
SONGA NAYO…

“NATAKA mnipe fedha za kuniwezesha kuishi maisha yangu vizuri baada ya kuacha kazi.”
“Kwa nini unataka kuacha kazi kwa waziri?”
“Nimechoshwa na kazi ya kutunza bustani.”
“Kwani wewe pale kwa Waziri Andrea Kazinja unafanya kazi ya kutunza bustani tu?”
“Ndiyo, kwani nani amewaambia ninafanya kazi nyingine?”
“Hapana tunakuuliza tu. Sasa kwa nini unataka kuacha kazi?” alihoji Tony huku wote wawili wakiwa wamemkazia macho Chisunga.
“Unajua… waziri Kazinja ni… ni…” alibabaika Chisunga kisha ghafla akabadilisha mada.
“Waziri Kazinja amefanya nini? Mbona humalizii kauli yako?”
“Ananifanyisha kazi ngumu lakini mshahara anaonilipa ni mdogo sana. Mi namfurahisha sana lakini wala hajali maslahi yangu.”
“Unamfurahishaje? Kazi gani ngumu unayomfanyia?” Deus na Tony walizidi kumuandama Chisunga kwa maswali wakitaka afunguke mwenyewe kilichokuwa ndani ya moyo wake.
Hata hivyo, Chisunga alikuwa hodari wa kubadilisha mada, kila alipokuwa akikaribia kufichua siri kubwa ya Waziri Kazinja, alikuwa akibadilisha mada haraka na kuanza kuzungumzia vitu vingine.
Tony na Deus walielewa haraka kuwa lazima Waziri Kazinja atakuwa amempa vitisho vikali kijana huyo juu ya kutotoa siri yake ya ushoga. Hata hivyo, kwa kuwa walikuwa wanajua kila kitu kuhusu tabia chafu ya waziri huyo kuingiliwa na Chisunga kinyume na maumbile, hawakutaka kuendelea kumdadisi.
“Kwa hiyo umesema tukikupa shilingi ngapi utatufanyia kazi yetu?”
“Si nimesema fedha zitakazonitosha kuishi kwa amani baada ya kuacha kazi?”
“Ok, sawa, tutakupa shilingi milioni hamsini. Zitakutosha?”
“Nyingi sana, nitafanyia nini zote hizo?”
“Tunataka ubadilishe maisha ya kwenu, uwajengee nyumba nzuri wazazi wako na nyingine utumie kwa matumizi yako binafsi.”
“Sawa nimekubali.”
“Tutakulipa nusu ya fedha hizo hapahapa na ukimaliza kazi tutakumalizia nusu nyingine. Usimwambie mtu yeyote kuhusu mpango huu, sawa?”
“Sawa,” aliitikia Chisunga huku akichekacheka kwa furaha. Fedha zilimtia ukichaa. Katika maisha yake, hakuwahi kuota kuwa anaweza kumiliki kiwango kikubwa cha fedha kama kile. Tony akafungua mlango wa gari na kuvuta briefcase iliyokuwa imejaa fedha, akatoa burungutu kubwa na kumpa Chisunga ahesabu mwenyewe.
“Mi sikusoma shule, nihesabieni wenyewe,” alisema Chisunga kwa aibu, Tony akamwambia kuwa zilikuwa shilingi milioni ishirini na tano taslimu. Chisunga alizichukua na kuzigawanya mafungu matatu, akaweka kwenye mifuko miwili ya mbele na mmoja wa nyuma.
“Kazi yetu itakamilika lini?”
“Kesho tu kila kitu kitakuwa tayari. Nipeni kabisa hicho kidonge.”
“Hiki hapa, utakisaga na kumchanganyia kwenye kinywaji chochote. Iwe pombe, maziwa, juisi au chochote lakini isiwe kwenye maji kwa sababu atashtuka.”
“Sawa, kesho mje muda kama huu nitakuwa nimeshamaliza kazi,” alisema Chisunga kwa kujiamini, akaaga na kuondoka kwa kasi kurudi nyumbani kwao.
“Lazima mpango wetu ufanikiwe, hizi fedha tunazotoa zitarudi tu, wala usiwe na wasiwasi,” alisema Tony huku akitabasamu.
“Unajua mimi bado najiuliza, yaani huyu kijana mchafumchafu kiasi hiki ndiyo anamfaidi Waziri Kazinja?”
“Ndiyo, mi si nilikwambia jamaa alianza tabia ya ushoga tangu akiwa sekondari? Yaani hata huyo mke wake unaambiwa siku aliyomfumania akishughulikiwa na mwanaume mwenzake, alizimia kwa mshtuko.”
“Daah! Kweli dunia imevaa taulo.”
“We acha tu, kibaya zaidi kumbe hata waheshimiwa kuna ambao si riziki,” Tony na Deus walikuwa wakipiga stori baada ya Chisunga kuondoka. Baada ya muda waliingia ndani ya gari lao na kuanza safari ya kurudi jijini Chato, kila mmoja akiwa na furaha ndani ya moyo wake kwani kazi ilikuwa ikielekea kukamilika.
***
“Bosi, leo utakuwepo nyumbani?”
“Ndiyo, vipi kuna tatizo?”
“Hapana bosi, nimekumbuka mambo yetu yale, usiku kucha leo sijalala.”
“Mh! Leo maajabu, yaani wewe ndiyo unanikumbuka wakati kila siku huwa nakulazimisha?”
“Nimeanza kunogewa na hako kamchezo, yaani kadiri siku zinavyozidi kusonga mbele ndiyo ninavyozidi kukupenda bosi. Njoo unichukue basi ili usiku nikushughulikie.”
“Leo sitaweza kuja kwa sababu jioni kuna kikao cha bodi ya wizara, ila kama unaweza kodi taksi ukija nitalipa.”
“Nitakukuta wapi?”
“Nipitie kazini kwani nitachelewa kidogo kutoka leo.”
“Sawa bosi, I love you!”
“I love you too,” alisema Waziri Kazinja na kukata simu. Kama ungesikiliza mazungumzo yao, ungedhani Chisunga anazungumza na mpenzi wake wa kike na Waziri Kazinja anazungumza na mwanamke wake, lakini haikuwa hivyo, walikuwa wakizungumza wanaume tupu.
Baada ya mazungumzo yale, Chizunga alianza kujiandaa, akachukua noti moja ya shilingi elfu kumi na kuiweka mfukoni kisha zile nyingine akazichimbia kwenye shimo ndani ya chumba chake cha kulala na kuzifukia. Akaenda kuoga kisha akavaa nguo zake za sikukuu. Hakusahau kidonge cha Acetamine- D alichopewa na Tony.
Baada ya kuhakikisha kila kitu kipo sawa, alitembea mpaka kwenye kituo cha magari, akapanda pick up iliyokuwa inaelekea jijini Chato. Baada ya mwendo wa takribani saa mbili, alishawasili mjini, akakodi taksi iliyompeleka mpaka ofisini kwa Waziri Andrea Kazinja.
“Nimeshafika bosi, nipo hapa nje na dereva taksi,” Chisunga alituma ujumbe mfupi kwenye simu ya Waziri Kazinja, muda mfupi baadaye akatoka mfanyakazi wa ofisi ile akiwa na fedha ya dereva taksi na funguo za nyumbani kwa Kazinja.
“Amesema mlipe kisha tangulia nyumbani kamwagilie bustani, yeye anaingia kwenye kikao,” alisema yule mfanyakazi wakati akimkabidhi Chisunga fedha na funguo.

Je, nini kitafuatia? Usikose kufuatilia Jumatano kwenye Championi Jumatano.